Monitro ansawdd aer yn “hwyr” ond codwyd cwestiynau ynghylch peiriannau diheintio osôn “dadleuol

Wrth ymateb i’r newyddion y bydd Llywodraeth Cymru yn darparu teclynnau monitro CO2 a systemau diheintio osôn i bob ysgol, coleg a phrifysgol, dywedodd llefarydd plaid Cymru ar addysg, Siân Gwenllïan AS,

“Mae cyngor gwyddonol wedi tynnu sylw ers tro at bwysigrwydd ansawdd aer wrth gyfyngu ar drosglwyddo coronafeirws – rydym wedi bod yn galw am fwy o arweiniad ac adnoddau i golegau ysgolion a phrifysgolion ar bwnc awyru ers y llynedd. 

“Mae’r ddarpariaeth o declynnau monitro CO2 i sefydliadau addysgol, tra’n hwyr, i’w groesawu, ac mae’n cyd-fynd â gwledydd eraill. Mae’n bwysig bod y mesurau a ddefnyddiwn yn cyd-fynd â’r canllawiau gwyddonol diweddaraf ac rwy’n annog Llywodraeth Cymru i roi sicrwydd i sefydliadau addysgol ar ddefnyddio teclynnau fel systemau diheintyddion osôn. 

“Mae cyflwyno peiriannau diheintio oson yn fwy dadleuol a dweud y lleiaf a rhaid i Lywodraeth Cymru ein sicrhau eu bod yn hollol ffyddiog eu bod yn ddiogel i’w defnyddio cyn eu cyflwyno ar draws Cymru.”