Lansio Tŷ Atgofion Cymru i gefnogi cymunedau Cymraeg

Amgueddfeydd yn dod at ei gilydd i greu rhaglen gymorth a dysgu ddwyieithog arloesol House of Memories Cymru ar gyfer Cymry sy’n byw gyda dementia

Wedi’i greu mewn partneriaeth ag Amgueddfeydd Cenedlaethol Lerpwl a Llywodraeth Cymru, bydd yr ap yn cefnogi’r gymuned dementia ledled Cymru.

Mae ap sy’n cynnwys atgofion o Gymru, Cymry a’u cymunedau wedi lansio yn Senedd Cymru, gyda’r nod o gysylltu, ymgysylltu a gwella bywydau pobl Cymru sy’n byw gyda dementia a’u hanwyliaid ledled Cymru a thu hwnt.

Mae House of Memories Cymru yn rhaglen ddwyieithog o weithdai, hyfforddiant ac yn becyn ap atgofion digidol cyntaf o’i fath, sydd â’r bwriad o gychwyn sgyrsiau rhwng pobl sy’n byw gyda dementia a’u gofalwyr.

Trwy becyn ap House of Memories Cymru, gall defnyddwyr chwilio drwy amgueddfa fyw o eitemau Cymreig a phersonoli eu profiad i gynnwys atgofion sy’n arbennig o gryf iddyn nhw.

Ysgogir atgofion yn yr ap gyda chymysgedd o sain, fideo a lluniau o eitemau hanesyddol.  Mae’r adrannau allweddol i bobl eu harchwilio yn cynnwys Cymru yn ystod y rhyfel, ffyrdd o fyw cymunedau Cymru, diwydiant, atgofion plentyndod, technoleg, trafnidiaeth a llawer mwy.

Yn cynrychioli bywyd bob dydd yng Nghymru, mae gwrthrychau’n amrywio o eitemau teuluol cyffredin mewn cartrefi, i ddigwyddiadau fel Streic y Glowyr yn 1984.  Cafodd yr ysgogiadau cof hyn eu curadu a’u casglu o gasgliadau presennol amgueddfeydd Cymru, i greu ap sy’n dathlu diwylliant Cymru, yn hen a newydd.

Mae House of Memories Cymru ar gael drwy ap My House of Memories gan Amgueddfeydd Cenedlaethol Cymru, ac fe’i grëwyd gan eu tîm House of Memories, sydd wedi ennill gwobrau.

Dywedodd Carol Rogers, cyfarwyddwr Amgueddfeydd Cenedlaethol Cymru: “Rydyn ni wrth ein bodd yn lansio House of Memories Cymru ac ychwanegu pecyn Cymreig pwrpasol i’n rhaglen House of Memories ryngwladol. Mae gan Gymru dreftadaeth ddiwylliannol gyfoethog ac amrywiol sydd wedi cael dylanwad enfawr ar Lerpwl, ac mae’n fraint cael gweithio mewn partneriaeth â chydweithwyr mewn amgueddfeydd ledled Cymru, i gefnogi cymuned dementia Cymru.

“Rydyn ni’n gobeithio y bydd y rhaglen nid yn unig yn helpu i wella bywydau pobl sy’n byw gyda dementia, ond hefyd yn gatalydd ar gyfer cysylltiadau ystyrlon rhyngddynt a’u teuluoedd neu ofalwyr.”

Mae amgueddfeydd ledled Cymru wedi cefnogi a chyfrannu at y prosiect i greu detholiad o 700 o ysgogiadau atgofion. Yr amgueddfeydd sy’n cymryd rhan yw: Hamdden a Llyfrgelloedd Aura, Amgueddfa Ceredigion, Canolfan Ddiwylliant Conwy, Amgueddfa Forwrol Llŷn, Treftadaeth a Dysgu MonLife, Amgueddfa Caerdydd, Oriel Môn, Amgueddfa Penmaenmawr, Amgueddfa Sir Faesyfed, Amgueddfa’r Ffiwsilwyr Brenhinol Cymreig, Gwasanaethau Amgueddfa Abertawe, Tŷ Weindio ac Amgueddfa Y Gaer. Mae Amgueddfeydd Cymru hefyd wedi ymuno â’r bartneriaeth gyda chymorth Cronfa Gymunedol y Loteri Genedlaethol.

Gyda phecyn ap House of Memories Cymru, gall defnyddwyr chwilio drwy amgueddfa fyw o eitemau Cymreig a phersonoli eu profiad i gynnwys atgofion sy’n arbennig o gryf iddyn nhw.

Ysgogir atgofion yn yr ap trwy gymysgedd o sain, fideo a lluniau o eitemau hanesyddol. Mae Cymru yn ystod y rhyfel, ffyrdd o fyw Cymunedau Cymru, diwydiant, atgofion o blentyndod, technoleg a thrafnidiaeth i gyd yn rhan allweddol o’r ap.

Dywedodd Dirprwy Weinidog y Celfyddydau, Chwaraeon a Thwristiaeth Llywodraeth Cymru, Dawn Bowden:  “Rwy’n falch iawn ein bod wedi gallu cefnogi House of Memories Cymru, sy’n dathlu diwylliant Cymreig a rôl amhrisiadwy amgueddfeydd Cymru wrth gefnogi pobl hŷn a’r rhai sy’n byw gyda dementia. Mae adnoddau dwyieithog fel House of Memories Cymru yn bwysig gan ei fod yn galluogi ein cymunedau yng Nghymru a thu hwnt i ymgysylltu â’n treftadaeth yn iaith eu dewis ar draws y byd. Byddan nhw’n gallu cysylltu â’u cymuned hyd yn oed os ydyn nhw gannoedd o filltiroedd i ffwrdd.  Hoffwn ddiolch i’r holl amgueddfeydd sydd wedi bod yn rhan o’r cydweithrediad hwn a fydd, rwy’n siŵr, yn gwneud gwahaniaeth i’r rhai sy’n byw gyda dementia a’u teuluoedd.”

Bydd House of Memories Cymru nawr yn cael ei gyflwyno ledled Cymru i helpu i gefnogi cymunedau Cymru, gyda hyfforddiant a gweithdai yn dechrau o amgylch y wlad a’r gweithdy cyntaf yn cael ei gynnal yn Abertawe ddydd Mercher 25 Hydref.

Am fwy o wybodaeth am y prosiect, gweithdai ac i ddarganfod sut y gallwch lawrlwytho’r ap, ewch i: www.liverpoolmuseums.org.uk/house-of-memories.