Taith teganau Nadolig Grŵp Beiciau Modur yn codi £4,000 i Elusen GIG

Mae taith teganau Nadolig poblogaidd Grŵp Beiciau Modur 3 Amigos a Dollies wedi codi £4,000 i Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda.

Cododd y daith teganau, a gynhaliwyd ar 9 Rhagfyr 2023, £3,000 i Ward Cilgerran, Glangwili a £1,000 i’r Gronfa Dymuniadau. Casglodd y grŵp hefyd 15 sachaid un dunnell o deganau a chodi £2,000 ar gyfer Gweithredu dros Blant.

Mae’r Gronfa Dymuniadau yn cefnogi’r gwasanaeth gofal lliniarol pediatrig i greu atgofion parhaol i’r plant, y bobl ifanc a’r teuluoedd y maent yn eu cefnogi.

Teithiodd y grŵp beiciau modur o amgylch gwahanol leoliadau ar draws Sir Gaerfyrddin a Sir Benfro yn casglu rhoddion yn y cyfnod cyn y daith.

Ar 9 Rhagfyr, teithiodd cannoedd o feicwyr modur drwy lawer o drefi de Sir Benfro, gan orffen y daith yn y ganolfan gynadledda ger Ysbyty Llwynhelyg lle dosbarthwyd y teganau a’r rhoddion i’r staff a mwynhau lluniaeth ysgafn.

Yna, ar ddydd Sadwrn 16 Rhagfyr, ymwelodd y grŵp, ynghyd â Siôn Corn, â ward Cilgerran, Glangwili i ddosbarthu mwy o deganau i blant yn yr ysbyty.

Dywedodd Tobi Evans, aelod o Grŵp Beiciau Modur 3 Amigos: “Mae gan bob un ohonom deulu neu’n adnabod rhywun y mae eu plant wedi bod angen gofal a thriniaeth yn Ward Cilgerran. Gwyddom fod yr arian a roddir yn mynd tuag at helpu cleifion a theuluoedd ar y ward i gael profiad gwell.

“Mae mor dda gweld cymaint o lawenydd y mae’r daith teganau yn ei roi i’r holl bobl sy’n dod allan i’n cefnogi. Mae helpu Siôn Corn i ymweld a dosbarthu anrhegion i’r plant yn yr ysbyty dros y Nadolig yn creu teimlad mor werth chweil.”

Dywedodd Karen Thomas, Pennaeth Chwarae Therapiwtig: “Diolch yn fawr iawn i bawb a gefnogodd y daith teganau. Rydych chi i gyd yn anhygoel ac ni allwn ddiolch digon i chi am bopeth a wnewch i ni.

“Daeth yr anrhegion hyn â llawer o lawenydd a hapusrwydd i’r plant a’r teuluoedd rydyn ni’n gofalu amdanyn nhw, sy’n aml yn gallu wynebu ansicrwydd a heriau.”