Staff a chleifion yn dweud eu dweud ar ddyfodol gofal iechyd

Mae staff bwrdd iechyd Hywel Dda, gan gynnwys clinigwyr, yn cydweithio â chynrychiolwyr cleifion a rhanddeiliaid i ystyried cefnogaeth a newid posibl i wasanaethau sydd o dan y pwysau mwyaf.

Mae’r bwrdd iechyd wrthi’n datblygu Cynllun Gwasanaethau Clinigol ar gyfer naw gwasanaeth gofal iechyd sydd angen cefnogaeth – gofal critigol, llawfeddygaeth gyffredinol frys, strôc, endosgopi, radioleg, dermatoleg, offthalmoleg, orthopaedeg ac wroleg.

Er mwyn cyflawni hyn, mae’r bwrdd iechyd yn siarad â staff, cleifion a sefydliadau partner ac yn cynnal gwahanol fathau o weithdai i ganfod beth yw’r problemau, i drafod syniadau newydd, ac i’w profi yn erbyn mesurau a gofynion sy’n bwysig i gymunedau yn ardal Hywel Dda.

Yn ystod tymor yr Hydref 2023, gwahoddwyd cleifion a oedd wedi defnyddio’r gwasanaethau sy’n rhan o’r Cynllun yn ystod y pum mlynedd diwethaf, yn ogystal â staff, i lenwi arolygon i rannu eu barn am y naw gwasanaeth gofal iechyd. Mae hyn eisoes wedi galluogi’r bwrdd iechyd i ysgrifennu papur i’r Bwrdd yn disgrifio’r materion sy’n effeithio ar y gwasanaethau hyn.

Cyflwynwyd y papur materion yng nghyfarfod Cyhoeddus y Bwrdd Iechyd ar 28 Mawrth 2024. Yna gwahoddodd Hywel Dda bobl a oedd wedi mynegi diddordeb i ymuno â grŵp dan arweiniad clinigol gyda chynrychiolaeth o blith staff, defnyddwyr gwasanaeth a rhanddeiliaid, â’r nod o ddatblygu syniadau ymhellach.

Cynhaliodd y bwrdd iechyd weithdy – digwyddiad cydgynghorol – ym mis Ebrill 2024 er mwyn i aelodau’r grŵp allu rhannu eu sgiliau a’u profiadau gwahanol ymhellach ac i drafod syniadau ynghylch hyd a lled gwasanaethau yn y dyfodol. Daeth dros 80 o bobl i’r digwyddiad.

Meddai Mark Henwood, Cyfarwyddwr Meddygol Dros Dro: “Fel rhan o’r Rhaglen Gwasanaethau Clinigol, rydym am sicrhau bod llais y claf yn cael ei gynrychioli. Rydym yn ffodus bod cynrychiolwyr cleifion, yn ogystal â’n staff, staff clinigol a rhanddeiliaid eraill, wedi bod yn barod i roi o’u hamser i ddarparu’r mewnbwn hwn.

“Rydym yn ymgysylltu â chynrychiolwyr cleifion o bob rhan o’r tair sir, a wahoddwyd i gymryd rhan yn y gweithdai hyn yn seiliedig ar broses ddethol ar hap er mwyn sicrhau tegwch a thryloywder. Mae mwy o weithdai ar y gweill rhwng nawr a’r haf.”

Meddai Lee Davies, Cyfarwyddwr Gweithredol Strategaeth a Chynllunio: “Bydd ein clinigwyr a’n gwasanaethau’n ystyried popeth yr ydym wedi’i glywed, ac yn gweithio i ddatblygu opsiynau gwasanaeth i’w hystyried gan y Bwrdd Iechyd yn ei gyfarfod ym mis Medi 2024. Byddwn yn hysbysu’r cyhoedd, ein staff a rhanddeiliaid yn ogystal â’u cynnwys. Unwaith y byddwn wedi datblygu’r opsiynau, byddwn yn ymgysylltu â’n cymunedau i ddeall beth fydd effaith unrhyw newidiadau.”

Gall y cyhoedd gael y wybodaeth ddiweddaraf am waith y bwrdd iechyd ar y Cynllun Gwasanaethau Clinigol yma: biphdd.gig.cymru/amdanom-ni/canolbarth-a-gorllewin-iachach/cynllun-gwasanaethau-clinigol/. Gall unrhyw un sy’n dymuno cymryd rhan mewn ymgysylltu yn y dyfodol neu a hoffai gael y wybodaeth ddiweddaraf ar ddatblygiadau o fewn Bwrdd Iechyd Prifysgol Hywel Dda, ymuno â’n cynllun ymgysylltu: https://biphdd.gig.cymru/gofal-iechyd/gwasanaethau-a-thimau/siarad-iechyd-talking-health/