Canolfan Tywi yn datgelu partneriaeth gyda Phrosiect Calon Sir Benfro

Mae Canolfan Tywi yn falch o gyhoeddi ei phartneriaeth gyda Phrosiect Calon Sir Benfro, sef menter arloesol sydd wedi’i chynllunio i roi’r sgiliau hanfodol i drigolion Sir Benfro i warchod a dathlu treftadaeth ddiwylliannol a hanesyddol gyfoethog yr ardal.

Mae’r fenter hon, sy’n rhan o Gronfa Ffyniant Gyffredin Cyngor Sir Benfro (SPF), yn cael ei chynnal o Fedi hyd at Ragfyr 2024. Nod y Gronfa yw meithrin balchder cymunedol, gwella cyfleoedd, a buddsoddi mewn busnesau lleol, pobl, a lleoedd.

Nid yw Prosiect Calon Sir Benfro yn ymwneud â chadwraeth yn unig; mae hefyd yn ymwneud ag adfywio’r celfyddydau, diwylliant, a gweithgareddau creadigol sy’n diffinio’r rhanbarth unigryw hwn. Bydd tîm Canolfan Tywi yn arwain rhaglen hyfforddi sgiliau treftadaeth gynhwysfawr, gan gynnig cyfuniad o brofiadau ymarferol, astudiaethau achos manwl, a dysgu achrededig. Bydd y cyfranogwyr yn ennill dealltwriaeth o’u treftadaeth leol wrth gyfrannu at gryfhau hunaniaeth gymunedol Sir Benfro.

Gall perchnogion tai edrych ymlaen at ein cwrs ar ‘Atgyweirio, Cynnal a Chadw ac Effeithlonrwydd Ynni mewn Adeiladau Hŷn,’ sy’n fan cychwyn delfrydol i’r rhai sy’n dymuno gwneud y gorau o’u heiddo hanesyddol trwy ddysgu sut i ofalu amdano’n briodol. I berchnogion ac ymddiriedolwyr adeiladau rhestredig, rydym yn cynnig arweiniad arbenigol trwy broses Caniatâd Adeilad Rhestredig. Yn ogystal, bydd ein cwrs ar ‘Gweithio gyda Chalch mewn Adeiladau’ yn darparu gwybodaeth ymarferol ar fynd i’r afael â diffygion adeiladu cyffredin, gan ddefnyddio Bwthyn traddodiadol o Sir Benfro fel astudiaeth achos.

Er mwyn cefnogi rhaglen profiad gwaith gyffrous, rydym yn cynnig cwrs ‘Rhagarweiniad i Waith Maen’ am wythnos, a arweinir gan y Meistr Saer Lleol a’r tiwtor, Oliver Coe. Bydd y cwrs ymarferol hwn yn rhoi sgiliau treftadaeth gwerthfawr i’r cyfranogwyr, gan eu galluogi i chwarae rhan hanfodol yn y gwaith o warchod a dathlu hanes lleol. Yn ogystal, i weithwyr proffesiynol yn y sector adeiladu treftadaeth, rydym yn cynnig Dyfarniad Lefel 3 achrededig mewn Atgyweirio a Chynnal a Chadw Adeiladau Traddodiadol.

Dywedodd Nell Hellier, Uwch Swyddog Treftadaeth Adeiledig Canolfan Tywi,

“Mae ein partneriaeth gyda Phrosiect Calon Sir Benfro yn tanlinellu ein hymrwymiad i warchod treftadaeth Cymru trwy addysg o ansawdd uchel. Mae cymunedau lleol yn hanfodol wrth warchod treftadaeth ein cenedl. Gyda dros 15 mlynedd o brofiad, rydym yn gyffrous i rannu ein harbenigedd mewn sgiliau adeiladu treftadaeth. Trwy ein hyfforddiant, gobeithiwn rymuso pawb i gofleidio eu rôl fel gwarcheidwaid treftadaeth adeiledig nodedig Cymru a’r DU.

“Mae’r fenter hon yn cynnig cyfle unigryw i unigolion ddatblygu a mireinio eu sgiliau treftadaeth, gan sicrhau bod hanes a diwylliant Sir Benfro yn cael eu diogelu ar gyfer cenedlaethau’r dyfodol. Rydym yn annog pawb i gymryd rhan yn y prosiect trawsnewidiol hwn.”

Am fwy o wybodaeth am waith Canolfan Tywi a sut i gymryd rhan, ewch: https://www.tywicentre.org.uk/what-we-do/