Penodi Dirprwy Brif Swyddog Gweithredol

Mae Bwrdd Iechyd Prifysgol Hywel Dda wedi cyhoeddi heddiw bod Lisa Gostling wedi’i phenodi’n Ddirprwy Brif Swyddog Gweithredol.

Mae Lisa wedi bod yn Ddirprwy Brif Weithredwr dros dro yn y bwrdd iechyd ers mis Chwefror eleni, tra’n aros am benodi’r Prif Swyddog Gweithredol parhaol, a gyhoeddwyd ym mis Hydref.

Dywedodd yr Athro Phil Kloer, Prif Swyddog Gweithredol Hywel Dda: “Rwyf wrth fy modd bod Lisa, yn dilyn proses gystadleuol, wedi’i phenodi i swydd y Dirprwy Brif Swyddog Gweithredol, cyfrifoldeb y bydd yn ei dal yn ychwanegol at ei swydd fel Cyfarwyddwr Gweithredol y Gweithlu a Datblygu Sefydliadol.”

Symudodd Lisa o Orllewin Canolbarth Lloegr i Sir Benfro a datblygodd ei gyrfa o fewn timau y gweithlu a datblygu sefydliadol yn y Bwrdd Iechyd. Mae wedi gweithio i Hywel Dda a’r sefydliadau a’i rhagflaenodd ers 1993. Ers 2015, mae wedi bod yn aelod o’r tîm Gweithredol a’r Bwrdd fel Cyfarwyddwr y Gweithlu a Datblygu Sefydliadol. Ers mis Chwefror eleni, bu hefyd yn Ddirprwy Brif Swyddog Gweithredol dros dro. Mae ganddi gymhwyster CIPD o Goleg Sandwell ac mae wrthi’n frwd yn dysgu Cymraeg.

Dyma Phil yn parhau “Mae dull arloesol Lisa o recriwtio a datblygu staff wedi bod o fudd mawr i’n bwrdd iechyd – gan gynnwys datblygu ein diwylliant a’n gwerthoedd sy’n llywio ein gwaith bob dydd, a sefydlu’r Rhaglen Brentisiaeth sydd wedi galluogi nifer o bobl leol i ymuno â’n timau yn Hywel Dda a datblygu eu gyrfa gyda ni.

“Mae Lisa hefyd wedi bod yn allweddol wrth gefnogi ein gwaith i leihau ein dibyniaeth ar staff asiantaeth ac adeiladu ein gweithlu parhaol – gan sicrhau mwy o gynaliadwyedd ac ansawdd yn ein timau.

“Rwy’n edrych ymlaen at barhau i weithio gyda Lisa yn ei rôl newydd a dyma ddymuno pob llwyddiant iddi yn y dyfodol.”

Ychwanegodd Lisa Gostling, Dirprwy Brif Swyddog Gweithredol a Chyfarwyddwr Gweithredol y Gweithlu a Datblygu Sefydliadol: “Mae’n anrhydedd cael fy mhenodi i’r swydd hon a chefnogi Phil, ein Bwrdd, a’n timau ar draws y bwrdd iechyd i ddarparu gofal iechyd i’n cymunedau. Edrychaf ymlaen at adeiladu ar sylfeini’r chwe mis diwethaf a gweithio gyda’n tîm o staff sydd i gyd yn ymroddedig i wella iechyd a llesiant cenedlaethau’r presennol a’r dyfodol.”