Mae Gan yr Ardd ei Chrafangau

Mae Hebogyddiaeth y Mynyddoedd Du yn ôl yn yr Ardd Fotaneg Genedlaethol yn Sir Gaerfyrddin y penwythnos hwn ar Ddydd Sadwrn a Dydd Sul, Awst 9-10 am ddau ddiwrnod o arddangosiadau hedfan ysblennydd.

Bydd hebogau Harris, boncathod a thylluan fawr yn esgyn i’r awyr fel rhan o ddwy sioe dyddiol, un am 12 canol dydd a’r llall am 2yp, a bydd cyfle i ymwelwyr wisgo’r dyrnfol a rhoi cynnig ar hebogyddiaeth.

Ac ar Ddydd Sul, bydd Côr Belmont o Abertawe, yn perfformio yn y Tŷ Gwydr Mawr. Fe’i ffurfiwyd ym 1964 fel Cantorion Brian Morris (mae Brian dal yn aelod gweithgar o’r Côr), maen nhw wedi canu o flaen Diana, Tywysoges Cymru, ac ymddangos ar y rhaglen dalentau chwedlonol Opportunity Knocks (daethant yn ail!). Mae ganddynt raglen amrywiol sy’n debyg o fod at ddant pawb. Ynghyd â chaneuon traddodiadol i gorau meibion, maen nhw’n canu caneuon ysbrydol ac emynau, caneuon gwerin, a chaneuon modern a phoblogaidd o’r sioeau.

Mae’r Ardd ar agor rhng 10yb a 6yh ar y ddau ddiwrnod, a bydd yr arddangosiadau gan yr adar ysglafaethus a pherfformiadau’r côr yn rhad ac am ddim i holl ymwelwyr yr Ardd.

Am fwy o wybodaeth am ddigwyddiadau’r Ardd, e-bostiwch info@gardenofwales.org.uk neu ffoniwch 01558 667149.