Gamblo ar gynnydd yn ystod y cyfnod clo ymysg grwpiau mwyaf agored i niwed, meddai TUC Cymru

• Mae bron i saith ym mhob deg (68%) o gamblwyr presennol wedi cynyddu un ai nifer yr arian neu’r amser a dreuliwyd ar o leiaf un gweithgaredd gamblo
• Arolwg YouGov yn datgelu bod gamblwyr rhwng 18-34 oed wedi nodi cynnydd mewn gamblo
• TUC Cymru yn lansio pecyn cymorth Gamblo Problemus yn ystod Wythnos Gamblo Mwy Diogel (19 – 25 Tachwedd)

Yn ôl TUC Cymru, mae pandemig y coronafeirws wedi bod yn “niweidiol tu hwnt” i’r rheiny yr effeithir arnynt gan gamblo problemus.

Mae dyledion, perthnasoedd yn torri i lawr, iechyd meddwl gwael a hyd yn oed hunanladdiad wedi bod yn gysylltiedig â thwf gamblo problemus yng Nghymru.

Dywedodd Ysgrifennydd Cyffredinol TUC Cymru, Shavanah Taj:  

“Gall gamblo problemus afael yn dynn ar eich bywyd chi. Bellach, mae eich ffôn symudol yn gasino yn eich poced, gyda gamblo ar-lein ar flaenau eich bysedd 24/7.  

Mae niweidiau gamblo yn mynd y tu hwnt i’r unigolyn, ac yn effeithio ar ei ffrindiau, ei anwyliaid a’i gydweithwyr.  

Gall Undebau chwarae rhan allweddol o ran cefnogi aelodau yn ystod eu taith iechyd meddwl, a’u cyfeirio at gefnogaeth briodol, wrth greu diwylliant yn y gweithle sy’n gefnogol ac yn llawn cydymdeimlad.

Dyma pam mae TUC Cymru wedi datblygu pecyn cymorth i gynrychiolwyr, er mwyn cefnogi aelodau sy’n wynebu gamblo problemus, ac i’w cyfeirio at gymorth.” 

Bydd pecyn cymorth TUC Cymru’n cael ei lansio ddydd Iau, 19 Tachwedd, gyda digwyddiad ar-lein yn ystod Wythnos Gamblo Mwy Diogel (19-25).

Ymhlith y siaradwyr yn y digwyddiad mae Carolyn Harris – Aelod Seneddol (Cadeirydd y Grŵp Seneddol Hollbleidiol ar Niwed Gamblo), Mick Antoniw – Aelod Senedd Cymru (Cadeirydd Grŵp Trawsbleidiol y Senedd ar Gamblo Problemus), ac ARA sy’n cynnig cwnsela a chefnogaeth i gamblwyr problemus a phobl eraill sy’n cael eu heffeithio ganddo.