Blas o Sbaen ar Benwythnos Tapas

Mae gwledd Sbaenaidd yn yr arfaeth am ddau ddiwrnod yng Ngardd Fotaneg Genedlaethol Cymru pan fydd Penwythnos Tapas yn dod â blas o Sbaen i Sir Gaerfyrddin ar Ddydd Sadwrn, Awst 30 a Dydd Dul, Awst 31.

Bydd bwydlen flasus yn gyforiog o Tapas ym Mwyty’r Ardd, stondinau yn gwerthu sangria, estrella, ham hallt, caws, chorizo a churros, ac arddangosiadau coginio yn cynnig cyngor ar sut i wneud eich Tapas eich hun.

Er mwyn sicrhau fod y penwythnos â thipyn o fynd ynddo, bydd ‘na ddawnsio fflamenco, gitarau Sbaenaidd, a sesiynau Zumba Iberaidd.

Bydd yr Ardd yn falch iawn i groesawu Academi Veritas, fydd yn canolbwyntio ar iaith a diwylliant Sbaen – wedi’i anelu at ein hymwelwyr 3-12 oed – trwy gyfrwng gemau, dawns, cerddoriaeth a gwisgo i fyny.

Er mwyn atgyfnerthu hawliad yr Ardd ei bod yn cynnig rhywbeth i bawb, mae hefyd sesiynau pyllau rhwydo (ar Ddydd Sadwrn), Helfa Fawr Pryfed (ar y Dydd Sul), ynghyd â Chwac Pac byd enwog Meirion Owen (ar y ddau ddiwrnod).

Felly, eleni, os nad y’ch chi’n mynd i Sbaen: Viva’r Ardd!.

Bydd pob gweithgaredd ar Benwythnos Tapas yn rhad ac am ddim, gyda thâl mynediad arferol yr Ardd, sy’n £8.50 i oedolion, £7 i’r henoed, £4.50 i blant (5-16), a phlant o dan 5 am ddim. Mae tocyn teuluol (dau oedolyn a hyd at pedwar o blant) yn £21.

Am fwy o wybodaeth am hwn a digwyddiadau eraill yn yr Ardd, ewch i www.gardenofwales.org.uk, e-bostiwch info@gardenofwales.org.uk, neu galwch 01558 667149.

Darlun: Y grŵp fflamenco Zambra Flamenca, gyda Dixey Ruscelli, sy’n perfformio ar y Penwythnos Tapas, ar Awst 30-31.