Atgyfnerthu’r Neges am Deithio Hanfodol ar gyfer digwyddiadau tymhorol yng Nghymru

Roedd Llywodraeth Cymru wedi cyflwyno cyfyngiadau ‘atal byr’ newydd i helpu i leihau lledaeniad Covid-19 ddydd Gwener diwethaf tan ddydd Llun 9 Tachwedd 2020.  Mae TrC yn atgyfnerthu’r neges bod cyfyngiadau ar deithio yng Nghymru yn ystod y cyfnod hwn a dim ond os yw eu taith yn hanfodol y dylai pobl deithio.

Penwythnos diwethaf, roedd ffigurau TrC wedi datgelu bod nifer o bobl yn teithio o Ogledd Cymru ac i Loegr ar gyfer y diwrnod/noson. Mae hefyd yn gwybod bod digwyddiadau chwaraeon yn cael eu cynnal dros y penwythnos, ac yna Calan Gaeaf a noson tân gwyllt, ac mae eisiau sicrhau bod y cyhoedd yn deall bod cyfyngiadau ar waith.

Dywedodd James Price, Prif Swyddog Gweithredol Trafnidiaeth Cymru;

“Diogelwch ein cwsmeriaid a’n cydweithwyr yw ein prif flaenoriaeth yn Trafnidiaeth Cymru ac rydyn ni’n cefnogi cyfyngiadau Llywodraeth Cymru yn llwyr i helpu i leihau lledaeniad Covid-19.

“Yn ystod cyfnod y cyfyngiadau, bydd trafnidiaeth gyhoeddus ar gyfer teithiau hanfodol yn unig a byddwn yn rhedeg llai o wasanaethau.”

Ychwanegodd Leyton Powell, Cyfarwyddwr Diogelwch a Sicrwydd TrC:

“Rydyn ni’n gwybod bod digwyddiadau chwaraeon yn cael eu cynnal dros y penwythnos a bod Calan Gaeaf a noson tân gwyllt yn dilyn hynny.

“Serch hynny, mae cyfyngiadau teithio ar waith a dim ond os yw hi’n hanfodol i bobl deithio y dylen nhw wneud hynny. Rydyn ni’n dymuno Calan Gaeaf hapus i’n holl gwsmeriaid, ond arhoswch gartref, achubwch fywydau a dim ond teithio os yw hi’n hanfodol eich bod yn gwneud hynny.”