Cadw’n egnïol yn eich cartref

Gyda’r cyfnod clo yng Nghymru yn rhoi mwy o bwyslais byth ar ynysigrwydd a llesiant pobl hŷn, mae Elusen Goldies Cymru yn cynyddu ei chynnwys ar-lein i gynnwys ymarferion ysgafn i’w gwneud gartref.

Dywedodd Heléna Herklots CBE, Comisiynydd Pobl Hŷn Cymru:

“Mae cadw’n egnïol yn wirioneddol bwysig ar gyfer llesiant pobl hŷn ac yn eu helpu i aros yn iach ac annibynnol. Ond mae’r pandemig wedi golygu y cafodd llawer o’r cyfleoedd arferol i bobl hŷn gadw’n egnïol eu colli.

“Felly rwy’n wirioneddol falch bod Goldies Cymru yn gweithio mewn partneriaeth gyda GIG Cymru i gyflwyno cyfres o sesiynau ymarfer ysgafn seiliedig mewn cadair fydd yn helpu pobl hŷn i symud yn ddiogel gartref drwy gydol wythnosau’r Gaeaf sydd o’n blaenau.”

Pan gafodd Elusen Goldies Cymru ei gorfodi oherwydd Covid i ganslo eu holl sesiynau yn ystod y dydd yn Ne Cymru fis Mawrth diwethaf, fe wnaethant gyflwyno sesiynau ar-lein drwy Facebook a YouTube. Fe wnaeth y rhain wedyn ddatblygu i ddod yn rhai dwywaith yr wythnos gyda sesiynau dydd Mawrth yn cael eu harwain gan Rachel Parry a sesiynau dydd Iau gan Cheryl Davies. Mae Rachel a Cheryl ill dwy wedi gweithio i’r Elusen am nifer o flynyddoedd yn cynnal sesiynau rheolaidd yn ystod y dydd.

Gyda sesiynau dydd Iau Cheryl yn seiliedig ar fformat poblogaidd Goldies o ganu gyda hoff ganeuon poblogaidd a geiriau ar y sgrin, mae’r sesiynau gan Rachel am 11am ar ddyddiau Mawrth wedi datblygu i fod â mwy o fformat cylchgrawn.

Dywedodd Rachel:

“Cawsom ymateb gwych gan ein pobl hŷn a rydyn ni’n awr yn ceisio rhoi sylw i wahanol bwnc bod dydd Mawrth.

“Mae’r ymarferion cadair yn annog pobl i ymestyn yn ogystal â chanu a gobeithiwn ddatblygu’r rhain yn yr wythnosau i ddod.

“Bu ein sesiynau Bollywood yn boblogaidd tu hwnt a’r wythnos nesaf bydd Sarita Sood unwaith eto yn dysgu rhai symudiadau dawns Bollywood syml a hyfryd a gaiff eu rhoi drwy fideo yn ein sesiynau dydd Mawrth.

“Mae dawnsio llinell bob amser wedi bod yn rhan boblogaidd iawn o sesiynau Goldies a byddwn yn cyflwyno mwy o’r rhain yn y dyfodol yn defnyddio fideos a gafodd eu gwneud cyn y cyfnod clo yn ein sesiwn Goldies wythnosol poblogaidd iawn yn Rhydypennau, Caerdydd, dan arweiniad Sue Thomas.

Mae’n rhwydd cael mynediad i www.goldieslive.com ac mae hefyd ar gael am ddim ar YouTube a drwy Facebook.

Ychwanegodd Grenville Jones, Sefydlydd Goldies:

“Pan gawsom ein gorfodi i ganslo ein sesiynau Goldies byw y llynedd, roedd hyn yn golygu na allai ein pobl hŷn ddod atom ni i fwynhau sesiwn yn eu hystafell gymunedol, neuadd eglwys neu lyfrgell. Gan na fedrent nhw ddod atom ni, fe aethom â Goldies atyn nhw drwy’r rhyngrwyd i’w cartrefi a dechreuodd canu soffa!