Ymgyrch Anfonwch Anrheg Elusen y GIG yn cefnogi cleifion iechyd meddwl ledled gorllewin Cymru

Ledled Cymru, mae elusennau’r GIG yn cyflawni rôl werthfawr gan sicrhau bod y rhoddion hael a roddir gan aelodau’r cyhoedd, yn aml i gydnabod y gofal iechyd y maent hwy a’u hanwyliaid wedi’i dderbyn, yn cael eu dosbarthu lle gallant wneud gwahaniaeth gwirioneddol i gleifion a staff y GIG. Nid yw’r arian yn disodli cyllid y GIG, ond fe’i defnyddir i ddarparu gwasanaethau a gweithgareddau y tu hwnt i wariant craidd y GIG.

Yng ngorllewin Cymru, mae Elusennau Iechyd Hywel Dda yn diolch i’r cyhoedd am eu cefnogaeth i apêl Nadolig flynyddol yr elusen, a oedd yn 2020 yn canolbwyntio ar wasanaethau iechyd meddwl oedolion. Dywedodd Tara Nickerson, “Roedd 2020 yn flwyddyn anodd i lawer o bobl ac mae gwasanaethau iechyd meddwl oedolion y GIG yn darparu rôl hanfodol yn trin cleifion yn yr ysbyty ac yn y gymuned. Rydyn ni wrth ein bodd gyda’r gefnogaeth anhygoel gan y cyhoedd, sydd wedi prynu eitemau sydd â gwerth gwirioneddol i’r cleifion y mae staff ein GIG yn gofalu amdanynt ledled Sir Gaerfyrddin, Ceredigion a Sir Benfro. ”

Prynodd aelodau’r cyhoedd 47 o eitemau gwerth cyfanswm o dros £740 i apêl Anfonwch Anrheg. Roedd y rhestr ddymuniadau yn cynnwys microdon, llyfrau coginio, eitemau tynnu sylw, offerynnau cerdd a deunyddiau celf a chrefft, pob un â’r bwriad o wella iechyd meddwl a llesiant cleifion.

Prynwyd mwy na 230 o becynnau o gardiau Nadolig elusennol rhwng Hydref a Rhagfyr, a chododd Diwrnod Siwmper Nadolig yr elusen ar gyfer staff a chefnogwyr ar Ragfyr 11eg dros £565, gyda gweithwyr rheng flaen y GIG a’r cyhoedd yn cymryd rhan wrth ddilyn rheolau pellhau cymdeithasol a chlinigol ar gyfer atal a rheoli heintiau lle bo angen.

Derbyniwyd cyfanswm o £2,311.33 o roddion, elw cardiau Nadolig, elw Diwrnod Siwmper Nadolig a rhoddion o ganlyniad uniongyrchol i ymgyrch y Nadolig, a gefnogwyd gan Phil Bennett OBE, arwr Cymru a Llewod Prydain, y comedïwr Rhod Gilbert, Michelle Evans-Fecci, a gyrhaeddodd rownd derfynol Great British Bake Off, a cyflwynydd teledu’r BBC Rachel Treadaway-Williams a anogodd y cyhoedd i gefnogi eu helusen GIG leol.

Dywedodd Nicky Thomas, Arweinydd Gwasanaethau Iechyd Meddwl Gwasanaeth Therapi Galwedigaethol “Diolch i’r ymgyrch Anfonwch Anrheg bydd gan ein cleifion fynediad gwell at therapïau fel hel atgofion, ysgogiad gwybyddol, cerddoriaeth, y celfyddydau, a gweithgareddau amlsynhwyraidd. Mae’r adnoddau hyn yn hanfodol ar gyfer therapïau unigol a grŵp. Rydym yn ddiolchgar am yr haelioni a hoffem ddiolch i bawb a roddodd. ”

Dywedodd y Therapydd Galwedigaethol, Louise Wheatley, Ward Sant Caradog Ysbyty Llwynhelyg, Hwlffordd, y byddai cleifion yn mwynhau gwylio ffilmiau o bellter cymdeithasol, diolch i daflunydd a sgrin a oedd wedi’u prynu. Ychwanegodd, “Mae gennym wneuthurwr smwddi da iawn, a all asio pob math o wahanol ffrwythau a llysiau ar gyfer opsiynau iach, ac yna popty araf i bobl sydd eisiau gwella eu sgiliau coginio, a llawer o ddarnau celf a chrefft ar gyfer mynegiant creadigol.”

Ychwanegodd Alexander Symmons, Therapydd Galwedigaethol yn Ward Morlais, Ysbyty Glangwili, Caerfyrddin ei ddiolch, “Mae’r microdon newydd ar gyfer cegin y cleifion yn amhrisiadwy, a dyna lle rydyn ni’n gwneud yr holl asesiadau a gweithgareddau coginio. Doedd yr hen un ddim yn gweithio yn arbennig o dda, felly rydyn ni’n ddiolchgar iawn am hyn.”

Dywedodd y Therapydd Galwedigaethol Zia Franks Uned Ddiogelwch Isel Cwm Seren, Hafan Derwen, Caerfyrddin “Diolch am ein bocs o nwyddau hyfryd. Mae wedi cael derbyniad da ac rydym eisoes yn gwneud defnydd da o’r eitemau yn y grŵp modiwleiddio synhwyraidd rydyn ni’n ei ddechrau. ”

Ychwanegodd Tara Nickerson, “Mae rhoddion i Elusennau Iechyd Hywel Dda yn helpu i wella profiad cleifion iechyd meddwl oedolion ledled Sir Gaerfyrddin, Ceredigion a Sir Benfro. Rydyn ni’n ddiolchgar iawn i’n cymunedau sydd wedi dewis cefnogi eu helusen GIG leol, ar adeg sy’n heriol i gynifer. “

I ddarganfod mwy am waith Elusennau Iechyd Hywel Dda ewch i: www.hywelddahealthcharities.org.uk