Rhybudd am Beryglon Carbon Monocsid yn Dilyn Ysgogi Canfodydd Newydd ei Osod

Mae’r Tîm Diogelwch cymunedol yng Ngwasanaeth Tân ac Achub Canolbarth a Gorllewin Cymru yn annog y rheiny sydd â llosgyddion tanwydd, tanau a ffyrnau yn y gymuned i osod canfodyddion Carbon Monocsid (CO) sy’n gweithio, a hynny’n dilyn dihangfa lwcus gan un o drigolion Aberdaugleddau ar ôl Ymweliad Diogel ac Iach gan y Gwasanaeth Tân ac Achub.

Yn ddiweddarach y diwrnod hwnnw, cafodd Gorsaf Dân Aberdaugleddau ei galw i’r eiddo wedi i’r canfodydd CO ddechrau seinio a mynd ati’n awtomatig i ddeialu’r system larymau. Sefydlodd y criw fod yna broblem gyda’r tân nwy yn yr eiddo, ac aeth ati i ddiogelu’r preswylydd trwy weithio gyda’i gwmni cyfleustodau i ynysu’r lle tân.

Dywedodd Will Stephenson, Rheolwr Criw ar gyfer Diogelwch Cymunedol yn Sir Benfro,

“Mae Carbon Monocsid yn llofrudd distaw, ac mae’r digwyddiad hwn yn enghraifft glir o ba mor bwysig yw canfodyddion Carbon Monocsid yn y cartref. Roedd y tîm yn falch o wybod ei fod wedi gallu osgoi trasiedi bosibl y tro hwn, ac rydym yn annog eraill i ystyried y risgiau sy’n gysylltiedig â dyfeisiau sy’n llosgi tanwydd. At hynny, mae’r digwyddiad hwn yn pwysleisio pwysigrwydd cydweithredu â’n hasiantaethau partner yn ein cymunedau, oherwydd, heb yr atgyfeiriad hwnnw, gallai’r canlyniadau fod wedi bod yn waeth o lawer. Mae hefyd yn pwysleisio pwysigrwydd ein diffoddwyr tân wrth gefn yn cynnal ymweliadau diogel ac iach.”

Mae carbon monocsid yn cael ei gynhyrchu pan nad yw rhai tanwyddau yn cael eu llosgi’n iawn. Mae hyn yn cynnwys nwy, olew a thanwyddau solet megis glo, golosg a phren. Gall carbon monocsid hefyd ollwng i’r eiddo trwy ffliwiau neu simneiau a rennir, a gall hyd yn oed dreiddio trwy waliau brics a phlastr.

Ychwanegodd Karen Jones, y Pennaeth Diogelwch Cymunedol ar gyfer Gwasanaeth Tân ac Achub Canolbarth a Gorllewin Cymru,

“Mae Carbon Monocsid yn nwy gwenwynig dros ben sydd heb liw, blas nac arogl. Gall llosgyddion tanwydd megis ffyrnau, tanau, boeleri a gwresogyddion dŵr gynhyrchu Carbon Monocsid os cânt eu gosod yn anghywir, eu trwsio mewn modd esgeulus neu eu cynnal a’u cadw’n wael, neu os yw ffliwiau, simneiau neu awyrellau wedi eu blocio. Mae’n hanfodol bod y rheiny sydd â llosgyddion o’r math yn sicrhau eu bod yn cael eu gwasanaethu’n rheolaidd, bod ffliwiau’n cael eu cadw’n lân, bod cartrefi’n cael eu hawyru’n dda, a bod canfodyddion Carbon Monocsid sy’n gweithio yn cael eu gosod yn y mannau cywir yn y cartref a’u bod yn cael eu profi’n rheolaidd.”

Mae Gwasanaeth Tân ac Achub Canolbarth a Gorllewin Cymru wedi darparu rhagor o wybodaeth am yr hyn y gallwch ei wneud i atal gwenwyn Carbon Monocsid ar ei wefan:

https://www.tancgc.gov.uk/cym/diogelwch/yn-y-cartref/diogelwch-carbon-monocsid/

Gall gwiriad ‘Diogel ac Iach’ gael ei gynnal gan y Gwasanaeth Tân ac Achub trwy ffonio 0800 169 1234 neu drwy ei ffurflen atgyfeirio ar ei wefan:

https://www.tancgc.gov.uk/cym/diogelwch/yn-y-cartref/ymweliadau-diogel-ac-iach/