Taith Tractorau Merched yn codi miloedd ar gyfer Uned Cemotherapi Glangwili

Mae Grŵp Hyfforddi Ffitrwydd Cavegirl wedi codi dros £5,000 ar gyfer yr Uned Cemotherapi Ysbyty Glangwili trwy gynnal Ras Tractor Merched ym mis Gorffennaf 2021.

Dechreuodd y Daith Tractorau ar Fferm Penfoel a daeth i ben yn y Railway Inn yn Llanpumsaint. Mwynhaodd y cyfranogwyr ddiod boeth a rôl cig moch a chawsant gyfle i gymryd rhan mewn raffl.

Dywedodd Prif Nyrs Canser Gina Beard: “Am swm anhygoel o arian! Rydym yn hynod ddiolchgar i’r merched o Grŵp Hyfforddi Ffitrwydd Cavegirl. Rydyn ni’n ddiolchgar iawn pan fydd y cyhoedd yn dewis cefnogi elusen ein bwrdd iechyd a’r gwasanaethau sy’n darparu triniaethau canser.

“Rydyn ni’n gallu defnyddio’r arian i gefnogi gwell profiad i gleifion. Mae arian a godir fel hyn yn helpu i ariannu adnoddau fel llyfrau defnyddiol a therapi chwarae i blant unigolion sy’n mynd trwy driniaeth canser, gwelliannau i amgylchedd yr uned sy’n ei wneud yn lle mwy cyfforddus, ac yn cefnogi prosiectau peilot fel CaPS sy’n darparu cefnogaeth seicolegol i bobl yr effeithir arnynt gan ganser a’u gofalwyr a’u perthnasau.

“Ni fyddai’r rhain yn bosibl heb godwyr arian anhygoel fel y merched hyn – gobeithio eich bod chi i gyd wedi cael hwyl hefyd!”