Mae cynhyrchydd o Ynys Môn wedi annog ffermwyr moch yng Nghymru i fanteisio ar gyfres o gyrsiau cigyddiaeth bwrpasol a drefnwyd gan Menter Moch Cymru.
Manteisiodd David Harries o Tyn y Lon, Penysarn, Ynys Môn ar y cyrsiau sydd wedi’u teilwra i anghenion cynhyrchwyr moch yng Nghymru nôl yn 2020 a dywedodd fod y cyrsiau ymarferol wedi eu galluogi fel teulu i ychwanegu gwerth at eu cynnyrch a dysgu sgiliau newydd sydd wedi bod yn fanteisiol i’w anghenion personol.
“Mae’r cwrs wedi rhoi cymaint o hyder a phrofiad i mi wella ein busnes o werthu ein porc ein hunain. Heddiw rwy’n gallu cael carcas llawn o’r lladd-dy a’i gigydda yma fy hun ar y fferm ar gyfer ein hanghenion ein hunain.”
“Fe wnaeth y cyrsiau hefyd agor cyfle arall i mi – i allu prosesu ein porc ein hunain ymhellach yn y dyfodol,” ychwanegodd.
O ‘Gigyddiaeth Moch Ymarferol’, I halltu cig a gwneud selsig’ i ‘Charcuterie ar gyfer dechreuwyr’ mae’r prosiect wedi cynnal nifer o sesiynau ledled Cymru fel rhan o’i ymrwymiad i ddarparu hyfforddiant arbenigol i gynhyrchwyr moch.
Ariennir Menter Moch Cymru gan Gymunedau Gwledig Llywodraeth Cymru – Rhaglen Datblygu Gwledig 2014-2020 a ariennir gan Gronfa Amaethyddol Ewrop ar gyfer Datblygu Gwledig a Llywodraeth Cymru.
Ychwanegodd David: “Byddwn yn annog cynhyrchwyr moch i fanteisio ar y cyrsiau sy’n cael eu cynnig. Mae’n gyfle i gael gwybodaeth am yr holl ddarnau gwahanol o borc a hefyd mae’n gyfle i ennill eich arbenigedd eich hun ym myd cigyddiaeth. Mwynheais y cwrs yn fawr.”
Mae gan Fenter Moch Cymru gyfres o gyrsiau cigyddiaeth yn y Ganolfan Technoleg Bwyd, Coleg Menai, Llangefni mis nesaf, cynhelir Cigyddiaeth Moch Ymarferol ar ddydd Mawrth y 15fed o Fawrth 2022 a chynhelir y Gweithdy Prosesu Ymarferol: Y broses o halltu cig a gwneud selsig ar Ddydd Mercher yr 16eg o Fawrth 2022.
Mae’r cyrsiau hyn yn cael eu hariannu’n helaeth gan Menter Moch Cymru ac ar gael am bris gostyngol o £50 yr un. Cysylltwch â Menter Moch Cymru ( www.menterochcymru.co.uk ) heddiw gan fod lleoedd yn gyfyngedig. Dyddiadau ar gyfer yr un cyrsiau yn Ne Cymru i’w cadarnhau yn fuan.
| [donate]
| Help keep news FREE for our readersSupporting your local community newspaper/online news outlet is crucial now more than ever. If you believe in independent journalism,then consider making a valuable contribution by making a one-time or monthly donation. We operate in rural areas where providing unbiased news can be challenging. |
