Anogir y rhai cymwys i ddod ymlaen wrth i ddyddiad cau rhaglen atgyfnerthu’r gwanwyn agosáu

Mae Bwrdd Iechyd Prifysgol Hywel Dda (BIP) yn atgoffa unrhyw un sy’n gymwys ac sydd heb ddod ymlaen ar gyfer eu pigiad atgyfnerthu COVID-19 y gwanwyn i dderbyn eu cynnig erbyn y dyddiad cau, sef dydd Iau, 30 Mehefin 2022.

Mae dyddiad cau o 30 Mehefin wedi’i gyflwyno i sicrhau y bydd gan bawb sy’n gymwys ar gyfer dos atgyfnerthu’r gwanwyn ddigon o egwyl rhwng hyn a sesiwn atgyfnerthu hydref 2022, os ydynt hefyd yn gymwys.

Pobl 75 oed a hŷn, y rhai a fydd yn dathlu eu pen-blwydd yn 75 oed cyn neu ar 30 Mehefin, preswylwyr hŷn mewn cartrefi gofal a’r rhai 12 oed a hŷn sydd â system imiwnedd wan (fel y’i diffinnir fel “gwrthimiwnedd” yn nhabl 3 a 4 o bennod 14a  Y Llyfr Gwyrdd (agor mewn tab newydd))  yn gymwys ar gyfer pigiad atgyfnerthu’r gwanwyn y gellir ei roi tua chwe mis (ac nid cyn tri mis) ar ôl derbyn y dos olaf o’r brechlyn.

Dywedodd Bethan Lewis, Cyfarwyddwr Cynorthwyol Dros Dro Iechyd y Cyhoedd ar gyfer Bwrdd Iechyd Prifysgol Hywel Dda: “Diolch i ymdrechion parhaus ein canolfannau brechu torfol, imiwnyddion cymunedol a phractisau meddygon teulu, mae bron i 40,000 o bobl wedi cael eu pigiad atgyfnerthu’r gwanwyn.

“Rydym am ei gwneud mor hawdd â phosibl i bobl gael mynediad at eu brechlyn ac felly bydd sesiynau galw heibio yn parhau yn ein canolfannau brechu torfol yn Aberystwyth, Cwm-Cou, Dinbych-y-pysgod, Hwlffordd, Caerfyrddin a Llanelli i unrhyw un 12 oed a hŷn.

“Gellir trefnu apwyntiadau a chymorth trafnidiaeth* ar gyfer y rhai nad ydynt yn wirioneddol yn gallu cael mynediad i ganolfan frechu torfol mewn unrhyw fodd arall trwy ffonio 0300 303 8322 neu anfon e-bost at COVIDEnquiries.hdd@wales.nhs.uk.”

Os yw rhywun sy’n gymwys i gael pigiad atgyfnerthu yn y gwanwyn wedi cael haint Covid yn ddiweddar, bydd angen iddynt aros 28 diwrnod o’r dyddiad y cawsant brawf positif cyn y gellir eu brechu. Byddant yn dal i allu cael eu brechu ar ôl 30 Mehefin fel rhan o’r ymgyrch hon os bydd yn rhaid iddynt ohirio eu hapwyntiad.

Nid yw ychwaith yn rhy hwyr i unrhyw un sydd angen dos sylfaenol neu ddos atgyfnerthu gael ei frechu. Mae sesiynau galw heibio ar gyfer pawb 12 oed a hŷn. Bydd plant 5 i 11 oed yn cael eu brechu mewn clinigau penodol ac felly mae’n rhaid iddynt drefnu apwyntiad.

Ar gyfer amseroedd galw heibio canolfan frechu torfol (ar gyfer pobl 12 oed a hŷn), ewch i hduhb.nhs.wales/covid19-vaccination neu ffoniwch 0300 303 8322. I drefnu amser apwyntiad, ffoniwch 0300 303 8322 neu e-bostiwch COVIDEnquiries.hdd@wales.nhs.uk