Cydnabod Gwaith Cyngor Sir Ceredigion yng Ngwobrau Effeithlonrwydd Ynni Cymru

Ar 17 Mehefin 2022, cynhaliwyd Gwobrau Effeithlonrwydd Ynni Rhanbarthol Cymru yng Nghaerdydd. Enillodd Cyngor Sir Ceredigion ddwy wobr am eu Cynlluniau Effeithlonrwydd Ynni.

Cynhaliwyd y gwobrau hyn i gydnabod gwaith rhagorol y sector arbed ynni yng Nghymru. Diben cynlluniau arbed ynni sydd ar waith ledled Cymru yw helpu perchnogion tai i leihau eu biliau ynni, mynd i’r afael â thlodi tanwydd a lleihau allyriadau carbon.

Mae Cyngor Sir Ceredigion wedi bod yn rhedeg y Cynllun Hyblygrwydd ECO a Chynllun Cartrefi Clyd Ceredigion ers nifer o flynyddoedd. Fel rhan o’r cynlluniau hyn, mae nifer o fesurau inswleiddio a systemau gwresogi wedi’u cyflwyno mewn amrywiol adeiladau i wella eu heffeithlonrwydd o ran ynni. Gan fod mwy o bwyslais wedi bod yn ddiweddar ar systemau gwresogi adnewyddadwy, mae llawer o waith y Cyngor bellach yn ymwneud â gosod pympiau gwres ffynhonnell aer.

Enillodd Cyngor y brif wobr yng nghategori Cyngor Rhanbarthol neu Awdurdod Lleol y Flwyddyn lle’r oedd un Cyngor eithriadol ym mhob un o 11 rhanbarth y Deyrnas Unedig yn cael eu cydnabod am ddangos gwir ymrwymiad tuag at hybu effeithlonrwydd ynni yn eu rhanbarth. Noddwyd y wobr hon gan Improveasy.

Ar gyfer y wobr hon, mae’r beirniaid yn edrych ar yr effaith y mae eu gwaith wedi’i chael yn y gymuned leol, yr hyn sydd gan eu cwsmeriaid a’u cymuned leol i’w ddweud am y cyngor, pa lefel o arbenigedd sydd gan y cyngor o fewn ei dimau ei hun a pha flaenoriaeth y mae’r cyngor yn ei rhoi i fynd i’r afael â thlodi tanwydd o fewn ei gynlluniau presennol.

Hefyd, enillodd y Cyngor y wobr Sefydliad Rhanbarthol y Flwyddyn am Gefnogi Cwsmeriaid Bregus gan ddangos gwir ymrwymiad tuag at wella bywydau pobl fregus yr ardal. Noddwyd y wobr hon gan Consumer Energy Solutions.

Y Cynghorydd Matthew Vaux, yw’r Aelod Cabinet sy’n gyfrifol am y Gwasanaeth Tai. Dywedodd: “Hoffwn longyfarch y tîm Tai am eu gwaith caled a’u llwyddiant yn y Gwobrau Effeithlonrwydd Ynni Rhanbarthol eleni. Gyda’r cynnydd presennol mewn costau tanwydd a’r cynnydd mewn costau byw, mae hyn yn gyflawniad gwych i dîm tai’r Cyngor o ran dangos eu bod yn helpu ein trigolion i arbed ynni a mynd i’r afael â thlodi tanwydd.”

Dewch o hyd i ragor o wybodaeth am Gynlluniau Effeithlonrwydd Ynni ar wefan y Cyngor: www.ceredigion.gov.uk/preswyliwr/tai/gwybodaeth-a-chymorth-ariannol/cynlluniau-effeithlonrwydd-ynni/