Apêl Cemo Bronglais yn cyrraedd y targed yn cael ei alw’n ‘newyddion gwych’Apêl Cemo Bronglais yn cyrraedd

“Newyddion gwych” oedd ymateb Mary Asprey i’r cyhoeddiad bod Apêl Cemo Bronglais wedi pasio ei tharged o £500,000 ac y gall y gwaith o adeiladu’r uned ddydd cemotherapi newydd ddechrau.

Profodd Mary o Fryncrug, Tywyn, yr uned ddydd bresennol tra bod ei diweddar ŵr Cyril yn derbyn triniaeth.

“Roedd yn gwneud cymaint o wahaniaeth gallu cael triniaeth yn Aberystwyth, oherwydd nid oedd mor bell i deithio. Felly, roeddwn yn falch o glywed bod Apêl Cemo Bronglais wedi’i lansio i alluogi agor uned ddydd cemotherapi newydd.

“Mae yna broblem gyda phreifatrwydd yn yr uned ddydd bresennol a bydd uned newydd bwrpasol yn gymaint o hwb i gleifion a staff. Po fwyaf o bobl leol y gellir eu trin yn Ysbyty Bronglais, yn hytrach nag ymhellach i ffwrdd, gorau oll. Rwy’n cofio inni orfod teithio i Ysbyty Glan Clwyd mewn storm eira unwaith. Roedd yn ofnadwy.”

Ychwanegodd: “Rwyf mor falch bod yr Apêl wedi cyrraedd ei tharged mor gyflym. Mae’n newyddion ffantastig.”

Cafodd Cyril ddiagnosis o lymffoma yn 74 oed, ar ôl dod o hyd i lwmp yn ei wddf.

“Roedden ni mewn sioc pan gawson ni’r newyddion ond fe wnaethon ni wisgo ein hetiau positif a dechreuodd Cyril gemotherapi y dydd Mercher canlynol yn yr uned ddydd,” ychwanegodd Mary.

“Am y chwe mis nesaf, fe fynychon ni’r uned bob pedair wythnos am ddiwrnod a hanner, diwrnod llawn o driniaeth ac yna hanner diwrnod.

“Roedd y staff yn yr uned cemotherapi yn wych. Fe wnaethon nhw wneud i ni deimlo’n gartrefol, fe wnaethon nhw esbonio popeth, dod â bwydlen i Cyril i ginio ac roedd digon o de, coffi a sudd ffrwythau bob amser. Doedd dim byd yn ormod o drafferth.

“Ar ôl chwe mis o driniaeth, roedd yn gwella dros dro ond dwy flynedd yn ddiweddarach dechreuodd gael problemau wrth basio dŵr a chafodd ddiagnosis o ganser y brostad.

“Yn anffodus, dilynodd diagnosis o diwmor malaen ar ei glust a chanfu sganiau pellach ei fod wedi lledu i’r iau, yr ysgyfaint a’r ymennydd a chollais Cyril ym mis Tachwedd 2020.”

Roedd Cyril wedi bod yn adeiladu model rheilffordd hardd yn yr ardd ond pan symudodd y cwpwl i fyngalo llai oherwydd ei salwch fe werthodd hwnnw a rhoi’r £5,000 i uned cemotherapi Ysbyty Bronglais oherwydd y gofal gwych a gafodd yno.

Ychwanegodd Mary: “Rhyngom ni mae gennym ni dri o blant, wyth o wyrion a phump o orwyrion, sydd wedi bod yn gefn mawr i mi ers colli Cyril. Mae gen i hefyd gwmni ein Springer Spaniel, Molly sy’n naw oed nawr.”