Elusen y GIG yn darparu £12,000 ar gyfer ystafell chwarae newydd yn ward plant

Mae Elusennau Iechyd Hywel Dda wedi gallu rhoi £12,000 i ddarparu ystafell chwarae newydd ar gyfer ward plant Cilgerran yn Ysbyty Glangwili, diolch i’ch rhoddion.

Mae elusen y GIG wedi prynu byrddau y gellir addasu eu huchder ar gyfer gweithgareddau chwarae, byrddau ystafell ddosbarth, byrddau bach a chadeiriau mewn coch a phorffor, soffa, cypyrddau storio y gellir eu cloi ar gyfer offer chwarae, cypyrddau celf a chypyrddau llyfrau.

Mae yna hefyd pod synhwyraidd, sy’n creu amgylchedd diogel, therapiwtig i blant ag anghenion ychwanegol, fel y gallant deimlo eu bod yn cael eu cynnwys mewn gweithgareddau yn yr ystafell chwarae. Ac mae offer chwarae newydd i annog datblygiad corfforol.

Darparwyd hefyd goleuadau disgo a seinyddion, ciwbiau synhwyraidd goleuo, teils llawr synhwyraidd, oferôls plant sy’n dal dŵr, matiau sblash, doliau a theganau addysgol.

Dywedodd Karen Thomas, Pennaeth Chwarae Therapiwtig: “Mae’n wych gallu sefydlu ystafell chwarae newydd ar y ward.

“Mae ystafell chwarae ddynodedig yn amhrisiadwy ac mae’r offer newydd hwn yn creu amgylchedd diogel, gan ganiatáu i bob plentyn ac oedolyn ifanc deimlo eu bod yn cael eu cynnwys, gydag ardaloedd ar wahân i blant a phobl ifanc yn eu harddegau.

“Mae gallu chwarae tra yn yr ysbyty yn golygu y gall plant a phobl ifanc barhau ag agwedd o’u bywyd normal. Mae chwarae yn gyfarwydd ac yn galonogol. Yn yr ysbyty, mae’n helpu plant i ddysgu a datblygu, ac i deimlo’n llai pryderus.

“Mae gan ystafelloedd chwarae rôl bwysig yn y broses iacháu a bydd yn helpu ein Tîm Chwarae Therapiwtig i weithio’n fwy effeithiol, gan helpu’r plant i ddeall eu triniaethau ac, yn bwysig, cael hwyl!”

Yn y llun yn yr ystafell chwarae newydd mae’r Cynorthwyydd Chwarae Owain Roach.

Dywedodd Nicola Llewelyn, Pennaeth Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda: “Mae cefnogaeth ein cymunedau lleol yn ein galluogi i ddarparu gwasanaethau y tu hwnt i’r hyn y gall y GIG ei ddarparu yn nhair sir Hywel Dda ac rydym yn hynod ddiolchgar am bob rhodd a dderbyniwn.”

I gael rhagor o fanylion am yr elusen a sut y gallwch chi helpu i gefnogi cleifion a staff lleol y GIG, ewch i www.elusennauiechydhyweldda.org.uk