Ford Gron Dinbych-y-pysgod yn rhoi £1,250 i Uned Gofal Arbennig i Fabanod

Mae Ford Gron Dinbych-y-pysgod wedi rhoi £1,250 i’r Uned Gofal Arbennig i Fabanod (SCBU) yn Ysbyty Glangwili.

Pan aned mab Edward Spence, cyn-Gadeirydd Ford Gron Dinbych-y-pysgod, fis Ebrill diwethaf, treuliodd sawl awr yn SCBU.

 Derbyniodd ofal a chymorth eithriadol gan y gwasanaeth, a dyna pam roedd y grŵp eisiau rhoi i’r uned.

 Meddai Edward: “Mae Ford Gron Dinbych-y-pysgod yn grŵp o wirfoddolwyr sy’n codi arian drwy gydol y flwyddyn i gefnogi amrywiaeth o achosion ac elusennau lleol a chenedlaethol.

“Rydym yn falch iawn o allu cefnogi’r Uned Gofal Arbennig i Fabanod a’i staff gwych gyda rhywfaint o elw ein Summer Spectacular a gynhelir gennym bob haf yn Harbwr Dinbych-y-pysgod.”

Dywedodd Bethan Odmundson, Uwch Nyrs: “Rydym yn ddiolchgar iawn i Ford Gron Dinbych-y-pysgod am eu rhodd garedig. Mae tîm SCBU ar hyn o bryd yn gweithio ar nifer o brosiectau y bydd ein rhoddion elusennol yn eu hariannu.

 “Bydd y rhodd garedig gan Ford Gron Dinbych-y-pysgod yn cael ei ddefnyddio i brynu nifer o eitemau a fydd yn cyfoethogi profiad teuluoedd, er enghraifft, pecynnau gofal; eitemau i ddiwallu anghenion amrywiol teuluoedd yn ystod eu cyfnod yn yr uned ac i wneud eu harhosiad mor gyfforddus â phosibl; ystafell newydd i rieni a theuluoedd, a theganau meddal.

 “Mae’r tîm yn rheolaidd yn prynu amrywiaeth o deganau meddal cyfatebol sy’n cael eu cynnig i deuluoedd pan fydd cyfnod o wahanu ac nad yw rhiant yn gallu bod gyda’i faban am resymau iechyd. Cedwir un tegan gan y rhieni a chedwir yr un paru gyda’r babi, gan roi cysur i’r teuluoedd.”

 Dywedodd Nicola Llewelyn, Pennaeth Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda: “Rydym eisiau dweud diolch enfawr i Edward a Ford Gron Dinbych-y-pysgod am eu rhodd wych.

“Mae cefnogaeth ein cymunedau lleol yn ein galluogi i ddarparu gwasanaethau y tu hwnt i’r hyn y gall y GIG ei ddarparu ac rydym yn hynod ddiolchgar am bob rhodd a dderbyniwn.”

 I gael rhagor o fanylion am yr elusen a sut y gallwch chi helpu i gefnogi cleifion a staff lleol y GIG, ewch i www.elusennauiechydhyweldda.org.uk