Cyflenwadau gardd a ariennir gan elusennau yn hyrwyddo therapi garddwriaeth

Diolch i roddion, mae Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda, wedi gallu prynu cyflenwadau gardd ar gyfer y Tîm Iechyd Meddwl Cymunedol yng Nghanolfan Adnoddau Cae’r Ffynnon yng Nghaerfyrddin.

Bydd y cyflenwadau gardd yn helpu i ddatblygu’r ardal awyr agored yn y ganolfan ymhellach a chreu gofod ar gyfer adsefydlu galwedigaethol, meithrin sgiliau ymarferol a therapi garddwriaethol.

 Gall cleientiaid ddefnyddio’r gerddi i wella eu hiechyd meddwl, yn ogystal â’u hiechyd corfforol, cyfathrebu a sgiliau meddwl.

 Dywedodd Karen Sharrock, Therapydd Galwedigaethol Arweiniol Clinigol: “Rydym mor ddiolchgar bod cronfeydd elusennol wedi caniatáu i ni brynu’r cyflenwadau gardd hyn.

“Mae’r ardal awyr agored yn darparu amgylchedd therapiwtig a thawel yn ogystal â rhoi cyfle i unigolion ddysgu ac adeiladu ar eu sgiliau galwedigaethol gan ddefnyddio garddwriaeth fel y cyfrwng therapiwtig.

 “Mae’r ardd yn brosiect parhaus sy’n rhan o gynllun gofal a thriniaeth y cleientiaid, gan alluogi adferiad ac annibyniaeth gyda’r nod o gefnogi unigolion i ddatblygu sgiliau a chysylltu â phrosiectau eraill yn y gymuned leol.”

 Dywedodd Nicola Llewelyn, Pennaeth Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda: “Mae cefnogaeth ein cymunedau lleol yn ein galluogi i ddarparu gwasanaethau y tu hwnt i’r hyn y gall y GIG ei ddarparu yn nhair sir Hywel Dda a rydym yn hynod ddiolchgar am bob rhodd a dderbyniwn.”

 I gael rhagor o fanylion am yr elusen a sut y gallwch chi helpu i gefnogi cleifion a staff lleol y GIG, ewch i www.hywelddahealthcharities.org.uk