Ymgyrch newydd St John Ambulance Cymru yn annog pobl Cymru i feddu ar sgiliau cymorth cyntaf ‘rhag ofn’

Mae St John Ambulance Cymru wedi lansio ymgyrch newydd i ddangos pwysigrwydd sgiliau cymorth cyntaf ‘rhag ofn’ i argyfwng ddigwydd.

Trwy’r ymgyrch, mae’r elusen yn annog pobl Cymru i roi, gwirfoddoli neu ddysgu sgiliau achub bywyd i gefnogi ei chenhadaeth o wneud cymorth cyntaf i bawb – unrhyw bryd, unrhyw le.

Fel elusen cymorth cyntaf Cymru, mae St John Ambulance Cymru yn dibynnu ar wirfoddolwyr yn rhoi o’u hamser a rhoddion gan bobl Cymru i gyflawni ei waith achub bywyd.

Gyda gwirfoddolwyr yr elusen yn cyfrannu dros 60,000 o oriau bob blwyddyn i ddarparu cymorth cyntaf ar gyfer dros 1,400 o ddigwyddiadau mawr a cymunedol ledled Cymru, gan gynnwys llu o gyngherddau diweddar Stadiwm y Principality, mae’r ymgyrch ‘rhag ofn’ yn ein hatgoffa’n llwyr fod yr elusen yno bob amser i gadw pobl Cymru’n ddiogel, pe bai argyfwng yn digwydd.

Gan fod bron i 1 miliwn o oedolion yng Nghymru heb ddysgu CPR a bod 80% o ataliadau ar y galon yn digwydd gartref, mae’r ymgyrch hefyd yn annog pobl Cymru i ddysgu sgiliau cymorth cyntaf achub bywyd, naill ai drwy gwrs hyfforddi yn y gweithle neu ddigwyddiad hyfforddi cymunedol.

Gall dysgu CPR gydag St John Ambulance Cymru fod y gwahaniaeth rhwng bywyd a gollwyd ac achub bywyd fel y mae Elaine Cooper, 60 oed o Dreherbert, yn dyst iddo, ar ôl achub bywyd ei gŵr gan ddefnyddio CPR ddau ddiwrnod yn unig ar ôl cwblhau cwrs cymorth cyntaf.

“Ni fyddwn wedi gallu ei wneud heb y sgiliau cymorth cyntaf a ddysgais,” meddai Elaine.

“Roeddwn i’n amheus ynglŷn â gwneud y cwrs cymorth cyntaf ac roeddwn i’n ystyried peidio â mynd, ond rydw i mor ddiolchgar fy mod wedi mynychu. Roedd yr holl brofiad mor frawychus, wnes i erioed feddwl y byddai’n rhaid i mi wneud CPR ar unrhyw un, heb sôn am aelod o fy nheulu.”

Tra bod St John Ambulance Cymru yn adnabyddus am ddarparu triniaeth a hyfforddiant cymorth cyntaf, mae hefyd yn darparu cludiant ambiwlans, gan wneud dros 28,000 o siwrneiau cleifion bob blwyddyn, ac yn cynnal rhaglenni i blant a phobl ifanc 5 oed ymlaen, gan helpu i hyfforddi’r genhedlaeth nesaf o achubwyr bywyd.

Un person ifanc o’r fath yw Harley Metz, naw oed, sy’n aelod o raglen Badgers Aberdâr a Foundry Town St John Ambulance Cymru, a achubodd fywyd ei fam ar ôl iddi fynd i mewn i goma diabetig gartref.

Dywedodd ei fam Dana Metz: “Mae Badgers yn hollol anhygoel i’r plant hyn. Mae cymorth cyntaf yn hynod o bwysig i blant ddysgu, oherwydd edrychwch beth ddigwyddodd. Pe na bai Harley yn mynd i Badgers ni fyddai ganddo’r wybodaeth sydd ganddo. Mae wedi bod yn Badger ers rhai blynyddoedd bellach ac mae wrth ei fodd.”

Dywedodd Nichola Couceiro, Pennaeth Cyfathrebu, Codi Arian ac Ymgysylltu St John Ambulance Cymru: “Rydym yn falch iawn o lansio ein hymgyrch newydd i atgoffa pobl Cymru bod St John Ambulance Cymru yno ‘rhag ofn’ y bydd argyfwng. Mae cymorth cyntaf yn achub bywydau felly mae’r gwaith rydyn ni’n ei wneud yn hanfodol i gadw pobl Cymru’n ddiogel.

“Fel elusen, rydym yn dibynnu ar wirfoddolwyr, cyrsiau yn y gweithle, codi arian a rhoddion i gadw cymunedau yng Nghymru yn ddiogel ‘rhag ofn’ eu bod angen ein cefnogaeth, a byddem yn annog pobl Cymru i ymweld â’n gwefan i ddarganfod mwy.”

I ddarganfod mwy ewch i www.sjacymru.org.uk