Dros 1,300 o ddisgyblion yn dysgu sgiliau achub bywyd fel rhan o lansiad ymgyrch ‘Defibruary’ St John Ambulance Cymru

Derbyniodd mwy na 1,300 o ddisgyblion ysgol arddangosiadau diffibriliwr a CPR yn ddiweddar gyda hyfforddwyr St John Ambulance Cymru, fel rhan o lansiad ymgyrch ‘Defibruary’ yr elusen.

Derbyniodd disgyblion ym mlynyddoedd 7-11 o Ysgol Uwchradd WRh Hwlffordd yn Sir Benfro wybodaeth allweddol am yr ymgyrch flynyddol, sydd â’r nod o godi ymwybyddiaeth o’r sgiliau achub bywyd hanfodol hyn a phwysigrwydd ymyrraeth gynnar pan fydd rhywun wedi dioddef ataliad y galon.

Mae elusen cymorth cyntaf Cymru yn trefnu amrywiaeth o ddigwyddiadau yn ystod mis Chwefror i helpu i godi ymwybyddiaeth o bwysigrwydd sgiliau diffibriliwr a CPR, gan fod siawns person o oroesi yn cael ei leihau 10% am bob munud sy’n mynd heibio heb weithredu yn dilyn ataliad y galon.

Bydd yr ymgyrch hefyd yn annog pobl i ddysgu ble mae’r diffibriliwr agosaf atynt wedi’i leoli drwy The Circuit a sicrhau bod unrhyw rai y maent yn gyfrifol amdanynt wedi’u cofrestru, fel y gall y gwasanaethau brys gyfeirio pobl at yr un agosaf mewn argyfwng.

Dywedodd Darren Murray, Pennaeth Gweithrediadau Ymateb St John Ambulance: “Roedd yn ffordd wych o lansio ein hymgyrch Defibruary flynyddol ac roedd y disgyblion yn awyddus i gael profiad ymarferol a rhoi cynnig ar roi’r sgiliau hyn ar waith yn ein sesiynau arddangos.

“Gan mai 5% yn unig yw eich siawns o oroesi ataliad y galon y tu allan i’r ysbyty yng Nghymru, rydym yn benderfynol o helpu i wella hynny drwy rannu’r sgiliau achub bywyd hyn a helpu pobl i fod yn fwy parod i weithredu’n gyflym mewn argyfwng.

“Hoffem ddiolch i’r ysgol am groesawu ein tîm a’n helpu i rannu’r negeseuon pwysig hyn gyda’r myfyrwyr, a fydd gobeithio yn fwy cyfforddus i weithredu i weithredu os byddant mewn sefyllfa o argyfwng yn y dyfodol.”

Mae ymgyrch Defibruary yn cael ei rhedeg oherwydd pobl fel Janice. Ddegawd yn ôl, dioddefodd Janice John ataliad ar y galon gartref. Yn ffodus, roedd ei gŵr Keith yn gwybod sut i wneud CPR ac fe wnaeth rhoi’r sgiliau hyn ar waith nes i griw ambiwlans gyrraedd gyda diffibriliwr.

Roedd Janice a Keith ill dau wedi cwblhau hyfforddiant cymorth cyntaf gan eu bod yn wirfoddolwyr gyda St John Ambulance Cymru ac yn ymatebwyr cyntaf gwirfoddol, ond nid oeddent byth yn disgwyl y byddai angen y sgiliau hyn mor agos at eu cartref.

Ddeng mlynedd ymlaen, mae Janice yn dal i fod yn wirfoddolwr gweithgar gyda St John Ambulance Cymru ac mae hefyd yn gweithio i helpu eraill gyda Gwasanaeth Ymateb Cyflym Lles a Chwympiadau’r elusen yn ardal Sir Benfro, sy’n cael ei redeg mewn partneriaeth â Bwrdd Iechyd Prifysgol Hywel Dda.

Dywedodd Janice, sydd ers hynny wedi prynu diffibriliwr rhag ofn y bydd rhywbeth fel hyn yn digwydd gartref eto: “Mae mor bwysig dysgu’r sgiliau cymorth cyntaf sylfaenol hyn ac mae’n hanfodol rhoi cymorth cyntaf cyn gynted â phosibl er mwyn rhoi gwell siawns o oroesi i bobl.”

Mae’r digwyddiad yn Ysgol Uwchradd Hwlffordd yn un yn unig o’r arddangosiadau cymorth cyntaf rhad ac am ddim mewn ysgolion a grwpiau cymunedol a gyflwynir fel rhan o bartneriaeth St John Ambulance Cymru ag EcoFlow, cwmni byd-eang sy’n arbenigo mewn cynhyrchion pŵer cludadwy, technoleg solar a datrysiadau ynni cartref clyfar.

I ddarganfod mwy am ymgyrch ‘Defibruary’ St John Ambulance a dysgu sut y gallwch chi gymryd rhan, ewch i www.sjacymru.org.uk/defibruary.