Wythnos Prentisiaethau Cymru: cyngor a chyfarwyddyd rhad ac am ddim ar gael i bobl yn Sir Gaerfyrddin i archwilio cyfleoedd

Wrth i Wythnos Prentisiaethau Cymru fynd rhagddi, mae Gyrfa Cymru yn tynnu sylw at y cymorth sydd ar gael i helpu pobl i archwilio’r gwahanol gyfleoedd sydd ar gael iddynt.

Mae prentisiaethau yn un o nifer o lwybrau y gall unigolion eu cymryd i ddatblygu sgiliau, ennill cymwysterau, a meithrin profiad yn y gweithle.

Maent yn cynnig cyfle i bobl o bob oed ennill arian wrth ddysgu, gan ennill cymwysterau cydnabyddedig a phrofiad ymarferol gwerthfawr.

Yn 2022-2023, gwelodd Cymru ymgysylltu sylweddol â rhaglenni prentisiaeth. Yn ystod y flwyddyn honno, cychwynnwyd 22,880 o raglenni dysgu prentisiaeth yng Nghymru.  Roedd hyn yn gynnydd o 14% ers y flwyddyn flaenorol (2021-2022). (Daw’r holl ddata o Dangosfwrdd Dysgu Prentisiaethau Medr

Roedd 25% o’r rhain yn ne orllewin Cymru, lle cychwynnwyd ar 5,650 o brentisiaethau. Cychwynnodd 1,365 o bobl brentisiaethau yn ystod y flwyddyn yn Sir Gaerfyrddin yn unig.

Gyda chyfleoedd mewn 23 o sectorau amrywiol, o ddiwydiannau creadigol i sgiliau gwyrdd, mae rhywbeth at ddant pawb. Y pum rhaglen dysgu prentisiaeth orau yn yng Nghymru yn 2022-2023 oedd:

1. Gofal Iechyd a Gwasanaethau Cyhoeddus
2. Rheolaeth a Phroffesiynol
3. Adeiladu
4. Gweinyddu Busnes
5. Peirianneg

Nid ar gyfer pobl ifanc yn unig y mae prentisiaethau yn addas. Pobl dros 19 oed oedd yn dilyn hyfforddiant dros 70% o brentisiaethau yng Nghymru yn 2022-2023. Pobl 40 oed ac yn hŷn oedd yn dilyn hyfforddiant dros 4,500 (neu 20%) o brentisiaethau a ddechreuodd yn 2022-2023.

Dywedodd Nikki Lawrence, Prif Weithredwr Gyrfa Cymru: “Mae Wythnos Prentisiaethau Cymru yn gyfle gwych i ddathlu prentisiaethau, a’r gwerth y maent yn ei gynnig i ddysgwyr, cyflogwyr, ac economi ehangach Cymru.

“Mae prentisiaethau’n darparu llwybr i bobl ennill cymwysterau wrth weithio ac ennill cyflog, a gallant fod yn llwybr gwerthfawr i’r rhai sydd am ddatblygu eu sgiliau.

“Gall ein cynghorwyr gyrfa ddarparu cymorth wedi’i deilwra i bobl o bob oed i archwilio prentisiaethau, yn ogystal â’r ystod lawn o opsiynau amgen sydd ar gael iddynt.”

I’r rhai sydd â diddordeb mewn archwilio cyfleoedd prentisiaeth yng Nghymru, mae adnoddau ar gael, gan gynnwys yr adnodd chwilio am brentisiaethau ar wefan Gyrfa Cymru, i’w cynorthwyo i ddod o hyd i swyddi a gwneud cais amdanynt.

Gallwch ddarllen mwy am y gwasanaethau am ddim a ddarperir gan Gyrfa Cymru and Cymru’n Gweithio, ffoniwch 0800 028 4844 neu e-bostiwch post@gyrfacymru.llyw.cymru.