‘Talk and Walk ‘5k yn codi £620 ar gyfer uned cemo Llanelli

Trefnodd Tracey John ‘Jo’s 5k Talk and Walk’ er cof am ei ffrind a’i chydweithiwr, Joanne Cross, a chodwyd £620 ar gyfer yr Uned Ddydd Cemotherapi yn Ysbyty Tywysog Philip.

Mae Tracey yn gweithio yn Nhîm Comisiynu Cyngor Sir Caerfyrddin fel Swyddog Monitro Ansawdd ar gyfer cartrefi gofal pobl hŷn. Bu’n gweithio ochr yn ochr â Joanne yn ddyddiol am dros 16 mlynedd.

Dywedodd Tracey: “Roeddwn i eisiau anrhydeddu addewid a wneuthum i Jo y byddwn yn gwneud taith gerdded 5k. Ymunodd grŵp o ffrindiau gwaith a gydol oes Jo ac aelodau o’r teulu â mi, a dyma ni’n ei alw’n ‘Jo’s 5k Talk and Walk’.

“Oherwydd ein bod yn aml yn sgwrsio a cherdded gyda’n gilydd, roedd yn gyfle i ni gyd fod gyda’n gilydd yn rhannu straeon tra’n codi arian at achosion mor deilwng.

“Cynhaliwyd y ‘Walk and Talk’ ar 8 Medi 2024 ym Mharc Dŵr y Sandy yn Llanelli. Roeddem yn gallu ymuno yng nghefn y Parkrun a 5k Walk Your Way. Cefnogodd rhedwyr, cerddwyr a gwirfoddolwyr ni drwy gydol y daith.

“Roeddwn i eisiau codi arian ar gyfer yr Uned Ddydd Cemotherapi yn Ysbyty Tywysog Philip a Chanolfan Ganser Felindre er cof am fy ffrind gorau, Jo, gan ei bod yn defnyddio’r ddwy uned. Bydd colled ar ei hôl am byth gennym ni i gyd.

“Roedd yn ddiwrnod perffaith yn cerdded gyda theulu a ffrindiau agos Jo. Roedden ni eisiau codi £500 i bob uned a llwyddo i godi dros £600 i’r ddwy.”

Dywedodd Nicola Llewellyn, Pennaeth Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda: “Hoffem ddiolch yn arbennig iawn i Tracey a phawb a fu’n ymwneud â Jo’s 5k Walk and Talk am gefnogi achos mor deilwng er cof am Jo.

“Mae cefnogaeth ein cymunedau lleol yn ein galluogi i ddarparu gwasanaethau y tu hwnt i’r hyn y gall y GIG ei ddarparu fel arfer ac rydym yn hynod ddiolchgar am bob rhodd a dderbyniwn.”

I gael rhagor o fanylion am yr elusen a sut y gallwch chi helpu i gefnogi cleifion a staff lleol y GIG, ewch i www.hywelddahealthcharities.org.uk